.jpg)
Nag-umpisa na ang pagpanagtag sang Darag Native Chicken (DNC) Starter Kit (20 ka munga kag apat ka sulog) sa banwa sang Sara, Iloilo kahapon Nobyembre 21, 2022. Sa sini nga proyekto ginpili ang 40 ka mga beneficiary (nga mangin multiplier farms). Ila pagabuligan ang local government sang Sara nga padamuon ang DNC sa ila banwa, kag para ang iban nga mga interisado nga mga pumuluyo makasagod man. Sa sina makapadamo sang DNC, ang mga taga Sara, bilang dugang nila nga palangabuhian.
Ang pagpadamo sang DNC sa Sara kabahin sang pagtinguha ni Mayor Aying nga hatagan sang palangabuhian ang mga pumuluyo kag masegurado nga ang tanan may sarang makaon ilabi nagid subong nga tuman ka mahal sang mga balaklon.
Natigayon ang ini nga proyekto sa bulig sang West Visayas State University gamit ang pundo halin sa Universidad kag sa Philippine Council for Agriculture, Aquatic and Natural Resources Research and Development of the Department of Science and Technology (DOST-PCAARRD). Ang local nga gobyerno sang Sara naghatag man sang cash, net para pangkudal sa ila mga DNC, kag incubator sa kada beneficiary. Ang tanan nga ila ginbaton halin sa Sara LGU nagabili sang 10 thousand pesos.
Ang 40 ka mga beneficiary kaupod ang iban pa nga nagasagod kag magasagod pa sang DNC sa Sara pagapormahon nga isa ka kooperatiba. Ini para mapapag-on ang pamaagi sa pagbaligya kag kapasidad sang mga beneficiary kag masmapasanyog ang DNC industry sa Sara.
Si Dr. Ricky Becodo, Project Leader kag Extension Director sang WVSU nagahingyo gid sa tanan nga taga Sara nga suportahan ang ini nga proyekto para madamo pagid ang mabuligan sa banwa sang Sara. (RPB)
Posts
